Në prag të fillimit të protestës së opozitës, ka reaguar ambasada italiane në Tiranë.
Në një deklaratë në “Facebook”, ambasada italiane I kërkon opozitës që të protestojë paqësisht dhe që të evitojë aktet e dhunës.
Duke ndarë të njëjtin qëndrim si Delegacioni i BE, ambasada italiane thekson se nuk do të tolerohet asnjë akt dhune ndërsa paralajmëron drejtuesit e protestës se përgjegjësia do të bjerë drejtpërdrejtë mbi ta.
Më tej, ambasada italiane u kërkon palëve politike që të nisin urgjentisht dialogun dhe të evitojnë situatën aktuale politike.
“Ambasada e Italisë në Tiranë respekton dhe mbështet plotësisht të drejtën themelore të qytetarëve shqiptarë për të protestuar, por vazhdon të theksojë rëndësinë e ushtrimit të kësaj të drejte në mënyrë të rregullt dhe paqësore. Ambasada e Italisë në Tiranë shpreh shqetësim të thellë për episodet e dhunës që kanë ndodhur së fundmi në disa rajone të Vendit. Çdo akt i dhunshëm apo formë e nxitjes për dhunë nuk mund të tolerohet në asnjë rrethanë. Është përgjegjësi e drejtpërdrejtë e organizatorëve për të garantuar që demonstrimet të zhvillohen në mënyrë të sigurtë, për pjesëmarrësit dhe për të gjithë qytetarët e Tiranës, si dhe për të shmangur çdo formë përshkallëzimi gjatë protestave. Përdorimi i lëndëve shpërthyese apo çfarëdo sendi tjetër të projektuar për të shkaktuar lëndime është absolutisht i papranueshëm. Në këtë kuadër, autoritetet ligjzbatuese gjithashtu kanë përgjegjësinë të vazhdojnë të veprojnë me vetëpërmbajtje, edhe nëse provokohen. Ambasada italiane në Tiranë u bën thirrje të gjitha palëve të angazhohen urgjentisht në një dialog konstruktiv për të tejkaluar situatën aktuale politike dhe për të mbështetur e konsoliduar përparimin që Shqipëria ka bërë në procesin e reformave.”
