Sekretari për Mediat në PS, Alfred Peza nuk do të jetë pjesë e listës së kandidatëve për deputetë në Partinë Socialiste. Lajmin e bëri të ditur vetë ai përmes një postimi në rrjetet sociale. Peza sqaroi se nga kryeministri Edi Rama i ka ardhur një ftesë, por ai e ka refuzuar, shkruan “Vizion Plus”.
“Sapo mbarova një takim me Kryeministrin Rama dhe kam dëshirë të ndaj me ju arsyen dhe përfundimin e takimit. Kryeministri më kërkoi gatishmërinë për të qenë pjesë e skuadrës së deputetëve, për zgjedhjet e 25 prillit 2021, duke vlerësuar kontributin tim si deputet më parë dhe si person i angazhuar në debatin publik më pas. Më erdhi mirë që në vlerësimin e tij, ai nenvizoi se ne debatin publik kam kontribuar jo si “partizan”, po si qytetar i angazhuar. Natyrisht me bindje e kahje në mbështetje të punës së kësaj mazhorance, por pa e shkelur kurrë etikën dhe pa i hyrë kurrë në hak partizançe palëve të tjera. E falënderova Edi Ramën për këtë interesim, që e konsideroj të posaçëm pasi nuk është në stilin e punës së tij! U ndjeva mirë duke e ditur edhe që listat jane plotësisht në dorën e drejtuesve të qarqeve, deri kur ata të vijnë nesër në zyrën e Ramës në PS para mbledhjes së Kryesisë në mbrëmje. Por refuzova. I thash kryeministrit dhe po jua them të gjithëve se jam ndjerë i privilegjuar që kam përfaqësuar edhe më parë, vullnetin elektoral të qytetarëve në Kuvendin e Shqipërisë. Por karrigia e deputetit nuk është për mua në këtë fazë të jetës dhe aktivitetit tim! Unë do të qëndroj në krah të Edi Ramës sepse besoj tek ai dhe puna e tij, pavarësisht nga pozicioni që mund të kem në raport me sfidat e mazhorancës që do të rikonfirmohet me siguri në 25 prill.”
Më herët u tërhoqën nga gara Vasilika Hysi, Besnik Bare, Sadi Vorpsi dhe Reme Lala.
