Fatbardh Kadilli, që garon përballë Lulzim Bashës për të marrë drejtimin e PD-së, zbuloi të vërtetën për pjesëmarrjen e tij në Lëvizjen “Mjaft” dhe u përgjigj për akuzën se është mbështetës i Erion Veliajt.
Në studion e “7 pa 5” në “Vizion Plus”, me gazetarin Thimi Samarxhiu, Kadilli pranoi se ka qenë pjesë e “Mjaft”. Por ai mohoi të jetë financuar nga fondacioni Soros. Demokrati rrëfeu të gjithë historinë e tij politike me “Mjaft”.
“Nuk kam punuar asnjë ditë për fondacionin Soros. Nuk jam financuar personalisht si activist nga fondacioni Soros. Unë nuk kam qenë asnjëherë në Lëvizjen “Mjaft”. Ajo që sot njerëzit e perceptojnë si Erion Veliaj e të tjerë, nuk janë ata që kam takuar. Ata ishin djem të rinj, që donin të ngrinin një projekt, një fushatë ndërgjegjësimi që shqiptarët të refuzonin qeverinë që nuk jepte shërbimet e caktuara. Kështu u konceptua fushata “Mjaft”, ishin fushata sensibilizimi, asnjë nga këto nuk u bënë parti politike. Në fushatën “Mjaft” që ishin 16 javë dedikuar indikatorëve të ndryshëm, kishim një bord me 9 veta, ku isha edhe unë. Ne ishim të ftuar për të qenë në bord si një Këshill Mbikëqyrës që i jepnim garanci donatorit. Nuk e financoi Soros, por ambasada e një vendi perëndimor. Pasi mbaroi fushata, nuk isha më pjesë e “Mjaft”, por kam patur bashkëpunim. Në 2004 ndodhi një tragjedi e famshme. FRPD, Lëvizja “Mjaft” dhe ne si koalicion antikorrupsion organizuam një protestë, ku i kërkuam dorëheqjen Fatos Nanos, dhe aty lindi lëvizja “Nano ik”.”
