Prokuroria dhe Policia e Elbasanit kanë zhvilluar mëngjesin e kësaj të hëne një operacion te gjerë në kuadër të hetimeve për inceneratorin.
Policia njofton se pas kontrolleve ka vënë në pranga Bledar Çullhaj, 36-vjeç, pasi në banesën e tij u gjet një armë e ftohtë si dhe vëllanë e deputetit socialist Saimir Hasalla, Denis Hasalla, 35 vjeç. Në shtëpinë e këtij të fundit, gjatë kontrolleve policia gjeti një sasi municioni luftarak.
Ditën e sotme, në zbatim të një vendimi të Gjykatës së Elbasanit, janë ushtruar 14 kontrolle në banesat e personave, mes tyre banesa e drejtorit te landfillit Leli Kaja, 7 drejtuesit teknik të secilës bashki të qarkut dhe mbikqyrësit të kontratës së inceneraotirt.
Veprimet janë ndërmarrë në kuadër të procedimit penal të vitit 2024, i cili është regjistruar fillimisht për veprën penale të “zjarrvënies”, pasi fusha e mbetjeve urbane në Elbasan u përfshi nga flakët asokohe.
Por gjatë hetimeve, Prokuroria ka evidentuar elementë të mundshëm të shpërdorimit të detyrës, çka ka zgjeruar objektin e hetimeve.
Operacioni është shtrirë në të gjithë qarkun e Elbasanit, ndërsa kontrollet e kryera kanë pasur për qëllim grumbullimin e provave të reja që lidhen me ndërtimin, funksionimin dhe administrimin e inceneratorit.
Inceneratori i Elbasanit është i vetmi impant i përfunduar nga tre kontratat e partneritetit publik privat të qeverisë shqiptare, të hetuara për korrupsion dhe pastrim parash nga Prokuroria e Posaçme./vizionplus.tv
