Vetëm disa javë ka që është kthyer nga një dëmtim që e mbajti larg fushave për dy muaj, sa që u desh të mungonte edhe në ndeshjet e kombëtares kuqezi. Mirëpo Torino, që e mori Arlind Ajetin në merkaton verore pas një Evropiani të shkëlqyer, nuk i ka dhënë ende mundësinë e debutimit, as pas rikuperimit nga problemet fizike. Gjithsesi ka skuadra në Serinë A, të bindura se 23-vjeçari është futbollist, që mund t’u japë një rritje cilësore në mbrojtje. E nëse do të vazhdohet me këtë situatë, lojtari mund të vendosë të kërkojë huazimin në janar.
Dy klube janë klubet që kanë shfaqur interes prej kohësh për futbollistin kuqezi. Në radhë të parë qendron Peskara, ku është krijuar një koloni shqiptarësh me Memushajn e Manajn dhe ku ndoshta mund ta ketë më të lehtë ambientimin. Madje, ky klubi që e ndjek Ajetin që prej verës, duket se ka në plan jo vetëm huazimin, por mundësisht të blejë kartonin e tij me hapjen e merkatos dimërore.
Gjithashtu, e interesuar për ish-mbrojtësin e Bazelit është edhe një tjetër italiane, si Krotone, skuadër që ashtu si Peskara lufton për mbijetesë. Të dy ekipet kanë shfaqur probleme në mbrojtje gjatë këtij sezoni dhe afrimi i Ajetit në janar do t’i ndihmonte ata të ndreqnin sadopak prapavijën. Lëvizja e mbrojtësit drejt një ekipi që do t’I jepte mundësi aktivizimi do të ishte në të mirë edhe të përfaqësueses kuqezi. Përderisa Ajeti duhet të jetë sa më në formë për ndeshjen e marsit kundër Italisë, atëherë kur Shqipërisë do t’i mungojë Gjimshti në qendër të mbrojtjes. De Biazi do të ketë nevojë për një Ajeti në gjendje optimale. Gjë që nuk mund ta arrijë, duke qendruar në stol. / Tring sport
