Shqipëria forcon pozicionin e saj, si anëtare e Aleancës së Atlantikut të Veriut.
Aeroporti i Kuçovës do të jetë baza e parë ajrore e NATO-s në Ballkanin Perëndimor. Këshilli i Atlantikut të Veriut ka miratuar vendimin për të ndërtuar në Shqipëri bazën e parë ajrore në Ballkanin Perëndimor. Lajmin e ka dhënë kryeministri Edi Rama përmes një statusi në facebook.
“Me fondet e Aleancës së Atlantikut të Veriut dhe në partneritet me Qeverinë e Republikës së Shqipërisë, NATO do të investojë mbi 50 milion euro, vetëm për fazën e parë të projektit për modernizimin e bazës ajrore të Kuçovës. Përmes këtij projekti, i cili pritet të nisë brenda këtij viti, Kuçova do të shërbejë si bazë mbështetëse për NATO-n për furnizim ajror, mbështetje logjistike; mbështetje për policimin ajror, si dhe trajnime dhe stërvitje të Aleancës”.
Kuçova, sipas kreut të qeverisë shqiptare, do të shërbeje njëkohësisht edhe si bazë kombëtare për Forcën Ajrore Shqiptare dhe ky investim strategjik i NATO-s në Shqipëri, do të sjellë një standart të ri për Forcat tona të Armatosura.
“Padyshim, një investim i këtyre përmasave krijon mundësi të reja për zhvillimin ekonomik e social të gjithë rajonit ku planifikohet ndërtimi i kësaj baze të re ajrore të teknologjisë së fundit. Paralelisht, po zhvillohen diskutime direkte me partnerin tonë strategjik, SHBA, për modernizimin e mëtejshëm të kapaciteteve ajrore shqiptare. Së shpejti, pritet që vendimet e përbashkëta të këtyre diskutimeve do të shkojnë për miratimin e Kongresit Amerikan”.
Për ministren e Mbrojtjes Olta Xhaçka, vendimi për shndërrimin e aeroportit të Kuçovës në bazë të NATO-s, është vlerësimi më të madh për seriozitetin, kontributin dhe përkushtimin, që pavarësisht kufizimeve e vështirësive, kanë treguar efektivët e Forcave të Armatosura të Shqipërisë.
Baza ajrore në Kuçovë u ndërtua në vitin 1955. Para anëtarësimit me të drejta të plota në NATO, gjatë viteve 2002 – 2004 iu nënshtrua rikonstruksionit për ta vendosur në standardet e Aleancës.
