Kryetari në detyrë Erion Veliaj dhe Bashkia e Tiranës kanë ankimuar në Gjykatën Administrative të Apelit vendimin e Gjykatës Administrative të Shkallës së Parë, e cila refuzoi të shqyrtonte në themel padinë për konstatimin e pavlefshmërisë absolute të dekretit të emërimit të prokurorit Ols Dado.
Në një postim në rrjetet sociale, Veliaj thotë se gjykata e mbylli çështjen për mungesë legjitimimi, pa hyrë në shqyrtimin e pretendimeve të ngritura për mënyrën sesi Dado është emëruar prokuror në vitin 2008. Sipas Veliajt, në momentin e emërimit, Ols Dado nuk kishte përfunduar Shkollën e Magjistraturës dhe, sipas padisë, nuk plotësonte kriteret ligjore përjashtimore që do të mundësonin emërimin e tij në këtë detyrë.
“Thelbi i çështjes është i thjeshtë: a mund të ushtrojë pushtetin penal të shtetit një person që pretendohet se është emëruar në kundërshtim me kriteret urdhëruese të ligjit?”, shprehet Veliaj, duke shtuar se pikërisht kësaj pyetjeje, sipas tij, gjykata nuk i dha përgjigje.
Kryebashkiaku i Tiranës argumenton se padia nuk lidhet thjesht me ligjshmërinë e një procedure emërimi, por me pretendimin për pavlefshmëri absolute të aktit. Sipas tij, një pavlefshmëri e tillë mund të konstatohet në çdo kohë dhe kryesisht nga gjykata.
Veliaj pretendon se, pavarësisht kësaj, Gjykata Administrative e Shkallës së Parë vendosi të mos e shqyrtojë në themel nëse akti që i ka dhënë Dados statusin e prokurorit është apo jo absolutisht i pavlefshëm. “Përballë pretendimit se pushteti penal i shtetit mund të jetë ushtruar për vite mbi bazën e një akti juridikisht të pavlefshëm, Gjykata zgjodhi të mos e verifikojë fare këtë pretendim”, deklaron Veliaj.
Sipas tij, çështja shkon përtej interesit personal dhe ngre një debat mbi kontrollin gjyqësor të ligjshmërisë së institucioneve që ushtrojnë pushtetin penal. “A janë të gjithë të barabartë përpara ligjit, apo prokurorët dhe gjyqtarët përjashtohen nga kontrolli gjyqësor i ligjshmërisë së titullit mbi të cilin ushtrojnë pushtetin e tyre?”, shkruan Veliaj.
Në vijim, ai i referohet edhe situatës së tij gjyqësore, duke argumentuar se, nëse një zyrtar i zgjedhur duhet t’i nënshtrohet hetimit dhe gjykimit, atëherë edhe ligjshmëria e titullit të prokurorit duhet të jetë objekt kontrolli gjyqësor. “Barazia para ligjit nuk mund të funksionojë vetëm për të akuzuarin. Edhe pushteti që heton dhe akuzon duhet të provojë se buron nga ligji”, thekson Veliaj.
Me ankimin në Gjykatën Administrative të Apelit, Veliaj dhe Bashkia e Tiranës kërkojnë që çështja të vijojë dhe të shqyrtohet në themel, duke kërkuar që gjykata të marrë qëndrim mbi pretendimin për pavlefshmërinë absolute të dekretit të emërimit të Ols Dados.
“Asnjë imunitet për Kryetarin e Bashkisë, por asnjë imunitet nga kontrolli gjyqësor për prokurorin”, përfundon Veliaj deklaratën e tij.
