Policia e shtetit nisur nga keqinterpretimi dhe keqpërdorimi për përfitime të ndryshme, këtë të enjte ka bërë një sqarim publik në lidhje me ngjarjen e ndodhur në Kavajë.
Sipas policicë shtetasja e mitur e shoqëruar nga nëna e saj, është paraqitur në Komisariatin e Kavajës me 29 janar, ku ka bërë dhe kallzim në lidhje me atë se çfarë i kishte ndodhur.
Menjëherë pas deklaratës së vajzës për shkak të moshës është vënë në dijeni Prokurorja e gatshme e Seksionit për të Mitur, pranë Prokurorisë Durrës, e cila me marrjen dijeni për këtë fakt, ka shkuar menjëherë në Komisariatin e Policisë Kavajë duke asistuar në të gjitha veprimet procedurale të kryera.
Gjithashtu gjatë procedurës, të miturës iu sigurua pjesëmarrja e një avokati mbrojtës dhe një psikologe, në zbatim të Kodit të Drejtësisë Penale për të Mitur.
“Në zbatim të detyrave të lëna dhe me qëllim dokumentimin ligjor të veprës penale, u janë marrë deklarime personave që mund të kishin dijeni për ngjarjen; mësueses kujdestare, psikologes së shkollës dhe drejtoreshës së shkollës, si dhe u kryen nje sërë veprimesh proceduriale të tjera. U be identifikimi i te gjithë shtetasve te dyshuar për këtë ngjarje dhe më datë 30.01.2019, rreth orës 08.40, (për arsye se në bazë të paragrafit 3, të nenit 77, të Ligjit Nr. 37/2017 “Kodi i Drejtësisë Penale për të Mitur”, ndalohet marrja më pyetje e të miturit gjatë natës, nga ora 22.00 deri në 08.00) është bërë intervistimi i tyre, si persona nën hetim për veprën penale te “Marrëdhënie seksuale ose homoseksuale me te mitur”, parashikuar nga neni 100, i Kodit penal, duke u pyetur ne prani te prindit, psikologut dhe avokatit mbrojtës. Gjithashtu me shtetasit e shoqëruar u kryen dhe veprime me metoda speciale të hetimit ku materiali u dërgua për vlerësim pranë prokurorisë. E dëmtuara u dërgua për ekspertim mjeko-ligjor pranë Mjekësisë Ligjore Tirane, e shoqëruar nga shërbimi i policisë.”
Ndër të tjera policia sqaron se në vijim të komunikimit me Prokuroren e çështjes, materialet e përpiluara u referuan pranë Prokurorisë Durrës, në Seksionin për të Mitur, në ngarkim të 8 të miturve si të dyshuar për veprën penale “Marrëdhënie seksuale apo homoseksuale me të mitur”, parashikuar nga neni 100 i Kodit Penal.
Gjithashtu uniformat blu theksojnë se është kujdesur në mënyrë që të organizohet puna dhe të merren masat e duhura në lidhje me këtë ngjarje të rëndë. Si rezultat i masave të marra, u bë i mundur shoqërimi dhe arrestimi i 7 prej tyre, ndërsa 1 u shpall në kërkim.
Me kërkesën e të dëmtuarës dhe të nënës së saj dhe duke marrë në konsideratë interesin më të lartë të fëmijës, si dhe në zbatim të dispozitave të Ligjit Nr. 37/2017 “Kodi i Drejtësisë Penale për të Mitur”, e konkretisht:
Neni 10 “Parimi i interesit më të lartë të fëmijës”
• Organet kompetente në çdo vendim dhe veprimtari të ndërmarrë në zbatim të këtij Kodi, duhet të vlerësojnë me përparësi interesin më të lartë të të miturit.
Nenit 21″Mbrojtja e jetës private të të miturit”, Paragrafëve 2 dhe 4, ku përcaktohet se;
• Nuk publikohet asnjë informacion që mund të çojë në identifikimin e të miturit në konflikt me ligjin, të të miturit viktimë ose dëshmitar i një vepre penale.
• Ndalohet identifikimi ose publikimi në çfarëdolloj forme i të dhënave personale të të miturit, me përjashtim të rasteve të parashikuara në legjislacionin për mbrojtjen e të dhënave personale.
Ndërkohë Policia e Shtetit, nuk ka bërë njoftim mbi rrethanat e detajet e ngjarjes, por në raportin ditor ku pasqyrohen ngjarjet e datës 02.02.2019, ka pasqyruar shumë shkurt pa të dhëna e detaje ekzekutimin e masave të sigurisë dhënë nga Gjykata.
