642 familje në zonën e Devollit të Sipërm kanë mbetur pa energji elektrike, bën me dije Prefektura e Korçës.
Sipas njoftimit zyrtar të OSHEE-së, shkak i ndërprerjes është funksionimi i pjesshëm i Fiderit 5 të Nënstacionit Bilisht.
Si pasojë, abonentët ruralë në zonat Vidohovë, Miras, Qytezë, Çetë, Sinicë dhe Arzë janë aktualisht pa furnizim me energji elektrike.
Ekipet e OSHEE-së ndodhen në terren dhe po ndjekin nga afër situatën, me qëllim identifikimin dhe riparimin e defekteve të evidentuara, si dhe rikthimin sa më të shpejtë të energjisë elektrike.
Ndërkohë, autoritetet bëjnë me dije se furnizimi me energji për konsumatorët e rëndësisë së veçantë vijon normalisht.
