Për vite me radhë, ushqime të ndryshme janë konsideruar të dëmshme për shëndetin, për t’u rikthyer më vonë si pjesë e një diete të ekuilibruar. Ekspertët theksojnë se rrallëherë një ushqim mund të klasifikohet thjesht si “i mirë” ose “i keq”, pasi rëndësi kanë sasia, shpeshtësia dhe mënyra e konsumimit.
Në mesin e ushqimeve që meritojnë një vlerësim më të balancuar është Parmigiano, i cili, pavarësisht përmbajtjes së yndyrave të ngopura dhe kripës, është burim proteinash, kalciumi, fosfori dhe vitamine B12. Edhe kafeja, nëse konsumohet pa sasi të mëdha sheqeri apo kremrash, përmban polifenole dhe kafeinë, e cila mund të ndihmojë në përqendrim dhe vigjilencë.
Edhe çokollata e zezë me përqindje të lartë kakaoje mund të konsumohet në sasi të moderuara, pasi përmban flavanole, magnez dhe hekur. Ndërkohë, patatet janë burim kaliumi, vitaminash dhe fibrash, veçanërisht kur konsumohen me lëkurë. Problemi qëndron kryesisht te mënyra e përgatitjes, pasi patatet e skuqura me shumë vaj, kripë dhe salca kanë një profil krejt tjetër ushqyes.
Në listë përfshihen edhe bananet, të cilat pavarësisht përmbajtjes së sheqernave natyrale janë fruta të pasura me kalium, vitaminë B6, vitaminë C dhe fibra. Ndërsa gjalpi kërkon më shumë moderim, pasi është i pasur me yndyra të ngopura dhe vaji i ullirit ekstra i virgjër mbetet zgjedhje më e mirë për përdorim të përditshëm.
Në fund, ekspertët theksojnë se një dietë e shëndetshme nuk duhet të bazohet te frika nga ushqime të veçanta. Më e rëndësishme është tabloja e përgjithshme e ushqyerjes: konsumimi i perimeve, frutave, proteinave, fibrave dhe yndyrave cilësore, duke ruajtur një marrëdhënie të ekuilibruar me ushqimin.
