Gazetaria mbetet një profesion i vështirë që shpeshherë vendos në rrezik jetën e gazetarëve ndërsa shifrat e regjistruara nga organizata “Reporterët pa kufij” për vitin 2019 flasin për 49 gazetarë të vrarë, 389 të burgosur ndërsa 57 prej tyre po mbahen peng.
Sipas raportit, numri i gazetarëve të vrarë këtë vit është në shkallën më të ulët në 16 vjet por ajo që ngre një debat të madh është fakti se numri i të vrarëve në vendet “në paqe’ vazhdon të jetë po aq i lartë sa edhe në vitet e shkuara.
Në Meksikë, janë vrarë 10 gazetarë, po aq sa edhe një vit më parë. Me gjithsej 14 gazetarë të vrarë, Amerika Latine është tani po aq vdekjeprurëse për gazetarët sa edhe Lindja e Mesme.
Në përmbledhjen vjetore mbi dhunën dhe shkeljet ndaj gazetarëve, të publikuar këtë të martë nga “Gazetarët pa Kufij”, thuhet se shifra paraqet një rënie prej 44 për qind krahasuar me vitin e kaluar.
Një aspekt tjetër shqetësues që nënvizon raporti, është shtimi i numrit të arrestimeve arbitrare të gazetarëve. Gjithsej 389 gazetarë janë në burgje në lidhje me punën e tyre, rreth 12 për qind më shumë sesa vitin e kaluar. Gjysma e tyre mbahen në burgje në Kinë, Egjipt dhe Arabinë Saudite.
