Më shumë se 300 mijë persona kanë zbarkuar në sheshin kryesor të Barcelonës, duke bërë thirrje për unitet.
Shumë prej protestuesve kërkuan arrestimin e liderit katalanas Carles Piudgemont.
Tubuesit janë kundër ndarjes së Katalonjës, vendim ky që mund të sjellë pasoja negative për rajonin.
Mediat ndërkohë raportojnë se Piudgemont mund të marrë azil politik në Belgjikë.
Një ditë pas heqjes së autonomisë në Katalonjë dhe shkarkimit nga detyra të presidentit të rajonit, në bazë të nenit 155 të Kushtetutës, Qeveria në Madrid emëroi zëvendëskryeministren spanjolle, Soraja Saenz de Santamaria në vend të Piudgemont dhe urdhëroi mbajtjen e zgjedhjeve të reja në rajon më 21 dhjetor.
Nga ana tjetër, qeveria qendrore do ta mirëpresë pjesëmarrjen e udhëheqësit katalanas Puigdemont në këto votime.
Por, ish presidenti katalanas këmbëngul të mos heqë dorë nga posti i tij dhe as nga pavarësia. Ai bëri thirrje për të kundërshtuar sundimin e drejtpërdrejtë të Madridit, duke theksuar se Spanja veproi kundër vullnetit të popullit katalanas.
Spanja vazhdon të jetë në krizë kushtetuese pas referendumit për pavarësi të një muaji më parë të organizuar nga lideri Piudgemont, gjë të cilën gjykata kushtetuese Spanjolle e quajti të paligjshëm.
Mbështetësit e referendumit kanë lajmëruar një grevë 10 ditore që do të fillojë më 31 tetor, pas zbatimit të masave të reja.
