Kreu i Partisë Demokratike, Lulzim Basha ka shkuar në Kukës, teksa premtoi se kur të marrë pushtetin do të heqë taksën e Rrugës së Kombit. Ndërsa theksoi se fuqizimi e ekonomisë është prioriteti i progamit të PD-së.
Sakaq, në bisedën që zhvilloi me qytetarët në Kukës në kuadër të nismës “Po të dëgjoj”, një nga banorët ngriti shqetësimin e largimit të të rinjve nga vendi. Ai u shpreh se janë 6 vëllezër dhe kanë 30 djem që janë jashtë vendit.
Lidhur me këtë, kryedemokrati u shpreh se është e nevojshme që të çlirohemi nga braktisja. Sipas tij, zhvillimi i ekonomisë i jep zgjidhje njëhere e përgjithmonë këtij fenomeni.
“Kukësi dhe familjet kuksiane po lëngojnë nga dhimbja e largimit të të rinjve me energji dhe talent, për shkak të mungesës së punësimit dhe arsimit. Sa më parë duhet të çlirohemi nga kjo braktisje, nga kjo e keqe! E ardhmja u takon të rinjve”, shkruan Basha krahas videos së shpërndarë në “Facebook”.
