Eksperti i qarkullimit rrugor, Fadil Likaj, i ftuar në studion e emisionit Quo Vadis në Vizion Plus, ka ngritur alarmin për pasojat e rënda që sjell parkimi i gabuar në rrugët e qytetit.
Sipas Likajt, parkimi në rresht të dytë nuk është vetëm shkelje e kodit rrugor, por shpesh është kthyer në shkak aksidentesh tragjike.
“Ligji ka qenë, nuk është krijuar tani. Për pjesën e kodit penal, kemi pasur aksident me pasojë vdekjen. Ka vdekur një djalë rreth 28 vjeç, sepse dikush ka parkuar në rresht të dytë. Vetëm për një kapriço që personi të parkojë makinën 100 metra më lart. Kjo sjell trafik të pafund dhe rrit mundësinë që shoferëve t’u ulet fushëpamja, duke shtuar rastet e aksidenteve”, tha Likaj.
Ai përmendi si shembull konkret rrugën e Kavajës në Tiranë, ku shpesh parkimi në rresht të dytë është kthyer në zakon.
“Shkojnë pinë kafe dhe lënë makinën në rresht të dytë. Kjo është e patolerueshme. Duhet marrë masa më të mëdha, jo vetëm arrestim. Ky parkim e çon trafikun deri tek Pallati me Shigjeta”, theksoi Likaj.
/vizionplus.tv
