Ministri i Brendshëm, Sandër Lleshaj ka njoftuar se 165 persona janë ndëshkuar me gjobë këtë të enjte pasi nuk kanë respektuar orarin e kufizimit të lëvizjes.
Në një postim në “Twitter”, Lleshaj shprehet se duke qarkulluar në mjedise publike shtohet rreziku për veten dhe të tjerët.
“Shumica absolute e shqiptarëve po respekton jetën e vet dhe të të tjerëve, duke zbatuar rregullat e parandalimit të përhapjes së COVID-19. Por fatkeqësisht ka edhe ndryshe. 165 persona janë gjobitur sot pas orës 10:00 nga Policia e Shtetit, për mos respektim të orarit të kufizimit të lëvizjes. Koha është për përgjegjshmëri të lartë dhe jo për “trimëri” të marrë. Ata që nuk kanë frikë për jetën e tyre, duhet të paktën të kenë respekt për jetën e të tjerëve. Duke qarkulluar në mjedise publike ne shtojmë rrezikun për veten, por dhe për të tjerët.”
Lleshaj tha se Policia dhe organet e tjera shtetërore janë të angazhuara të sigurojnë zbatimin e ligjit dhe të rregullave. Mirëpo, sipas tij, kërkohet edhe bashkëpunimi i qytetarëve të ndërgjegjshëm në mënyrë që këto rregulla të funksionojnë.
“Ju lutem raportoni në numrin 112, ose në aplikacionin “Komisariati Digjital” rastet e shkeljes së rregullave të vendosura për parandalimin e përhapjes së COVID-19. Vetëm kështu do të mund t’ia dalim.”
