Enti Shtetëror i Statistikave në Maqedoninë e Veriut, bën të ditur se 29.5% e popullsisë se përgjithshme në këtë vend janë shqiptarë nga të cilët 24.3% janë rezidente, thënë ndryshe mbi një milionë e 800 mijë banorë.
Të dhënat bazohen në regjistrimin e kryer nga data 5 deri më 30 shtator të vitit 2021. Krahasuar me shifrat e vitit 2002, numri i popullsisë shqiptare ka shënuar rënie me rreth një për qind.
Nga numri i përgjithshëm i popullsisë rezidente më shumë se 58 për qind e tyre janë deklaruar maqedonas, 3.84 për qind turq, 2.5 për qind janë nga komuniteti rom , 0.47 për qind janë vllehë, 1.3 për qind serbë dhe 0.87 për qind janë boshnjakë.
APOSTOL SIMOVSKI
DREJTOR, ENTI SHTETËROR I STATISTIKAVE
“Regjistrimi i popullsisë u realizua me sukses. Ne dëshmuam se mundemi dhe dimë të realizojnë regjistrim të popullsisë. Nëse më parë duheshin dy vjte për shpalljen e rezultateve, këtë herë e arritëm për gjashtë muaj, ashtu siç e kishim planifikuar.”
Me ndryshimet kushtetuese të vitit 2002, të drejtat e shqiptarëve në Maqedoninë e Veriut janë rregulluar në bazë të përqindjes së tyre në popullsinë e vendit.
Përveç maqedonishtes, gjuhë zyrtare në këtë shtet është edhe gjuha, të cilën e flasin mbi 20 për qind e popullatës jomaqedonase, e në këtë rast i korrespondon gjuhës shqipe.
Në këtë referencë, shqiptarëve u sigurohen edhe të drejtat e tjera kombëtare, si përfaqësimi në institucione, përdorimi i simboleve kombëtare, gjuhësore e kulturore.
Mbi bazën e këtyre kushteve, procesi i regjistrimit të popullsisë është politizuar, duke bërë që të mos mbahej për 20 vjet.
