Zoran Milanovic do të drejtojë shtetin kroat në 5 vitet e ardhshme. Në balotazhin e mbajtur një ditë më parë, ai arriti të marrë 54.1% të votave ndërsa rivalja e tij, presidentja aktuale Kolinda Grabar Kitarovic 45.99% . Ish-kryeministri socialdemokrat pritet të marrë zyrtarisht detyrën më 19 shkurt.
“Populli i Kroacisë më zgjodhi të jem Presidenti i Kroacisë, i Kroatëve dhe gjithë të tjerët që jetojnë këtu, dhe unë jam i lumtur. E di se ka shumë të tjerë që nuk më pëlqejnë, por ne duhet të jetojmë me njëri-tjetrin. Nuk do të dëgjoni histori me sheqer për unitetin nga unë, por shpresoj dhe besoj se nuk do ta tradhtoj besimin që më keni dhënë. Ne po kërkojmë vendin tonë në Europë edhe pse sfidat janë të mëdha por kemi shpresë se do tia dalim.”
Me fitoren e këtyre zgjedhjeve, Zoran Milanovic bëhet Presidenti i 5-të i Kroacisë si dhe kandidati i parë presidencial në historinë kroate që mori më shumë vota në raundin e parë të zgjedhjeve sesa një president në detyrë.
Milanović u zgjodh kryeministër më 23 dhjetor 2011. Gjatë qeverisjes së tij u shënua përfundimi i procesit të ratifikimit të hyrjes së Kroacisë në Bashkimin Europian. Por në zgjedhjet e parakohshme parlamentare në shtator 2016 ai pësoi një humbje befasuese ndaj njoftoi tërheqjen nga politika.
Më pas hyri në biznesin e këshillimit dhe punoi si këshilltar i kryeministrit Edi Rama.
