Gazetari i Vizion Plus, Esido Barkaj, në një lidhje me emisionin “Quo Vadis”, të moderuar nga Pranvera Borakaj, theksoi se situata mbetet alarmante dhe autoritetet janë ende në tension, pasi flakët mund të përhapen në vatra të reja.
Ai tha se deri në këto momente janë 60 forca zjarrfikëse në terren dhe po punohet intensivisht për neutralizimin e zjarrit.
Më tej, Barkaj theksoi se ka dyshime që zjarri mund të jetë shkaktuar nga një shkëndijë elektrike, megjithëse pritet ende përfundimi i hetimeve.
Pjesë nga biseda:
Barkaj: Janë përhapur vatrat e zjarrit. Janë shkrumbuar të gjitha bizneset brenda një kapanoni. Aktualisht janë 60 forca zjarrfikëse me 11 mjete në terren. Flakët janë përhapur dhe janë aktivizuar vatra të tjera zjarri. Janë kërkuar shërbime shtesë zjarrfikëse, si dhe ndihma e ushtrisë. Policia është në gatishmëri. Megjithatë, forcat zjarrfikëse kanë dyshime se brenda bizneseve ka bombola gazi, ndërsa është bërë stakimi i energjisë elektrike për çështje sigurie. Është kërkuar edhe evakuimi i banorëve. I menjëhershëm ka qenë edhe reagimi i tregtarëve, të cilët janë afruar për të marrë materialet e tyre.
Borakaj: Janë lejuar?
Barkaj: Jo, nuk janë lejuar. Flakët po përhapen më tej. Pista kryesore mbetet ajo e energjisë elektrike, megjithatë është ende herët për të folur për shkaqet dhe dëmet. Kuptohet që dëmet janë të mëdha. Pritet një reagim zyrtar nga Policia për të dhënë më shumë detaje.
Borakaj: Zjarri është afër zonës së banuar, sa rrezikojnë pallatet përreth zonës?
Barkaj: Deri në këto momente, forcat zjarrfikëse po përpiqen të izolojnë flakët. Nuk ka ende një rrezik të madh, por situata mbetet për t’u ndjekur, pasi ekziston frika e autoriteteve që zjarri të përhapet më tej.
