Një vatër zjarri është shfaqur gjatë ditës së sotme në fushën e Maliqit, duke përfshirë një sipërfaqe të konsiderueshme të zonës torfike.
Zjarri rrezikoi përhapjen në tokat bujqësore përreth, ku janë mbjellë kryesisht me kulturën e misrit.
Burime nga terreni bënë me dije se ndërhyrja në kohë e shërbimit zjarrfikës ka qenë vendimtare për izolimin e flakëve, duke parandaluar përhapjen e tyre në sipërfaqet e mbjella.
Për shkak të përbërjes torfike të tokës, zjarri ka qenë i vështirë për t’u shuar, pasi nxehtësia përhapet nën sipërfaqe, duke e mbajtur rrezikun aktiv për një kohë më të gjatë. Megjithatë, forcat zjarrfikëse kanë arritur të vendosin situatën nën kontroll pa dëme të tjera të raportuara.
Autoritetet lokale apeluan për kujdes të shtuar, duke qenë se temperaturat e larta dhe thatësira e ditëve të fundit kanë rritur ndjeshëm rrezikun e shpërthimit të zjarreve në zona të hapura.
