Situata e zjarreve në vend paraqitet në përmirësim, por disa vatra vijojnë të jenë aktive. Sipas Ministrisë së Mbrojtjes, deri në orën 14:00 të 24 gushtit janë raportuar 18 vatra zjarri, nga të cilat 5 janë aktive dhe 7 të tjera nën mbikëqyrje.
Në operacionet e ditës janë angazhuar 216 forca operacionale dhe 8 automjete zjarrfikëse. Forcat e Armatosura kanë kontribuar me 70 efektivë, një automjet zjarrfikës, një ekskavator të rëndë dhe dy helikopterë për ndërhyrjet në zonat më të vështira.
Vëmendja kryesore është përqendruar në Malin e Dajtit, ku po punojnë 30 efektivë të Forcave të Armatosura dhe 30 zjarrfikës, të mbështetur edhe nga ajri. Pavarësisht terrenit të vështirë, autoritetet bëjnë me dije se nuk ka rrezik për zonat e banuara. Ndërkohë, në Pukë situata është përmirësuar ndjeshëm, pasi zjarret në Gjegjan, Gojan të Vogël dhe Gojan të Madh janë shuar, ndërsa vatra në Prozhëm vijon me intensitet të ulët.
Në qarkun Dibër mbeten aktive vatrat në Ballenjë dhe Qafën e Helmës, ndërsa zjarri në Bërshi është shuar. Në Lezhë, vatrat në Lufaj dhe Shtuf janë fikur, ndërsa Kalivaçi dhe zona e Tenës vijojnë të monitorohen. Edhe në Elbasan dhe Vlorë po mbahet nën vëzhgim situata, pa rrezik për banesat.
Një vatër e re është raportuar në malin e Luzatit, në Tepelenë, ku strukturat zjarrfikëse vendore kanë nisur ndërhyrjen. Autoritetet vijojnë monitorimin dhe ndërhyrjet në të gjitha zonat e prekura, me fokus mbrojtjen e banesave dhe parandalimin e përhapjes së flakëve.
/vizionplus.tv
