Në Nju Jork po mbahet Forumi i Nivelit të Lartë Politik për Zhvillimin e Qëndrueshëm, i njohur ndryshe si Samiti për Objektivat e Zhvillimit ku merr pjesë edhe Shqipëria.
Ky samit vlerësohet si një moment kyç për realizimin e objektivave veçanërisht pas ndikimit të pandemisë, agresionit rus dhe një sërë faktorësh të tjerë.
Në takimin që i parapriu nisjes së sesionit të 78-të të Asamblesë së Përgjithshme të OKB-së, presidenti Bajram Begaj u shpreh se zhvillimi i qëndrueshëm është garancia më e fortë për të ruajtura paqen dhe stabilitetin.
PRESIDENTI I REPUBLIKËS
BAJRAM BEGAJ
“Dëshiroj të theksoj se Shqipëria është në një rrugë zhvillimi të përshpejtuar, duke përqafuar një qasje gjithëpërfshirëse dhe transformuese që përfshin zhvillimin ekonomik, social dhe mjedisor. Zbatimi i agjendës së Objektivave të Zhvillimit të Qëndrueshëm nuk është vetëm një prioritet; është një përpjekje kombëtare kolektive ku janë angazhuar të gjitha institucionet shtetërore, përfshirë shoqërinë civile”
Presidenti republikës Bajram Begaj do të mbajë në ditët në vijim fjalën në sesionin e 78 të asamblesë së përgjithshme të Kombeve të Bashkuara.
