Për Bashkimin Europian problemet e pronave që kanë shoqëruar shoqërinë shqiptare për afro tre dekada, duhet të gjejnë zgjidhje. Në një tryezë diskutimi të organizuar nga Delegacioni i BE-së në Tiranë, ambasadorja Romana Vlahutin vuri theksin tek detyrimi për respektimin e të drejtave të njeriut, sipas saj i panegociueshëm.
“Është detyrimi ynë si përfaqësues të BE-së të punojmë bashkë me autoritetet shqiptare ndaj detyrimeve të shtetit për tu bërë shtet anëtar i unionit. Për Bashkimin Europian të drejtat e njeriut nuk negociohen. Kjo për ne është shumë e qartë. Ky është një detyrim ynë si përfaqësues të BE-së të tregojmë problemet. Kuptoj se ka shumë emocione që lidhen me çështjet e pronave që kanë kaluar në dekada, por që të kemi dialog duhet të respektojmë njëri-tjetrin”
Nga ana e saj ministrja e Drejtësisë Etilda Gjonaj tha se qeveria ka ndërmarrë nismat ligjore për t’i dhënë zgjidhje këtij problemi të mprehtë.
Në takim, përfaqësues të shoqatave të pronarëve kanë kërkuar angazhimin e delegacionit të BE-së për të bërë sa më tepër presion ndaj institucioneve shtetërore për gjetjen e zgjidhjeve për problemet e tyre.
