Kryeministri Edi Rama ka zhvilluar sot një konferencë të përbashkët për shtyp me Presidentin e Këshillit Europian António Costa, i cili ndodhet në Tiranë në kuadër të vizitës së tij zyrtare.
Gjatë deklaratës së tij, Costa vlerësoi progresin e Shqipërisë në procesin e integrimit europian, duke theksuar se vendi ka treguar vendosmëri të qartë në përmbushjen e kritereve dhe reformave të kërkuara nga Bashkimi Europian.
Ai u shpreh se Shqipëria ka përmbushur pikat e ndërmjetme për grupkapitullin e parë të negociatave, ndërsa shtetet anëtare kanë njohur angazhimin e vendit për të ecur përpara në rrugën drejt anëtarësimit.
“Përgëzoj vendosmërinë e Shqipërisë dhe përpjekjet e saj për t’u bërë shtet anëtar i BE-së. Javën e shkuar, ne e pamë ecurinë e Shqipërisë dhe Shqipëria ka përmbushur piketat e ndërmjetme për grup kapitullin e parë. Shtetet anëtare kanë kuptuar angazhimin e Shqipërisë për të ecur përpara drejt BE-së. Siç e thoni edhe ju shpesh, këto reforma, më shumë se sa kushte të vendosura nga BE, janë zgjedhje nga ana juaj për të ndërtuar institucione të forta demokratike. Ju inkurajoj që të përshpejtoni përpjekjet tuaja për luftën kundër korrupsionit dhe krimit të organizuar”, deklaroi Costa.
Sipas tij, procesi i zgjerimit të Bashkimit Europian nuk është vetëm një mundësi, por një domosdoshmëri gjeostrategjike në kushtet aktuale të pasigurisë globale, duke theksuar se ai përfaqëson një investim për paqe, stabilitet dhe siguri në kontinent.
“BE është partneri më i besueshëm i Ballkanit Perëndimor dhe Shqipërisë. BE mbështet ecurinë e Shqipërisë, që Shqipëria të jetë një vend i begatë. Anëtarësimi në BE është shumë më shumë se sa thjesht të jesh pjesë e tregut unik. Do të thotë që ti bëhesh pjesë e një bashkimi politik që është ndërtuar në bazë të disa vlerave të përbashkëta. BE ka sjellë paqe dhe stabilitet në kontinent për të gjitha shtetet anëtare. Zgjerimi ua ofron këto mundësi fqinjëve tanë si Shqipëria. Në këto kohë plot pasiguri gjeopolitike, më shumë se sa mundësi, zgjerimi është një domosdoshmëri gjeostrategjike për Evropën. Është investim të paqja, stabiliteti dhe siguria e kontinetit tonë”, tha Costa.
Costa theksoi gjithashtu se Bashkimi Europian mbështet fuqimisht rrugën e Shqipërisë drejt anëtarësimit dhe inkurajoi vijimin e reformave për forcimin e institucioneve demokratike dhe sundimit të ligjit.
