Në kampin opozitar ende vazhdojnë negociatat mes Partisë Demokratike dhe partive aleate për nivelin e përfaqësimit të tyre në listën e kandidatëve për deputet. Vetë Basha ka preferuar të mos japë detaje për negociatat, edhe pse kritikat publike nga aleatët nuk kanë munguar gjatë këtyre ditëve veçanërisht nga aleati historik i PD, Fatmir Mediu.
LULZIM BASHA
KRYETAR I PD
“Po vazhdojnë negociatat me të gjithë aleatët dhe do të keni njoftimin zyrtar nga grupi i negociatorëve.”
3 muaj para zgjedhjeve Basha ka arritur një marrëveshje me Agron Dukën, pritet përcaktimi i detajeve finale me Shehin, Ndokën e Dulen; ndërkohë që pjesa më e vështirë e bisedimeve është ajo me Fatmir Mediun e Shpëtim Idrizin të cilët kërkojnë më shumë se një pozicion në zonën e sigurt të kandidatëve për deputet të PD.
Përveç marrëveshjes me aleatët, Basha pritet të mbyllë edhe drejtuesit politik në 12 qarqet e vendit. Sot ai shpalli nënkryetarin e PD Edmond Spaho si drejtues politik në Korçë dhe pedagogun Mark Marku si drejtues të qarkut të Lezhës. Ky është rikthim i Markut si kandidat për deputet në qarkun që ai ka përfaqësuar në parlament gjatë viteve 2009-2013. Në 2013 Marku u la jashtë listës së kandidatëve nga Sali Berisha për shkak të kritikave të tij të forta ndaj Partisë Demokratike.
Por Mark Marku ishte një prej 5 figurave të komisionit të vlerësimit, i cili vitin e kaluar caktoi se cili duhet të jetë ose nuk duhet të jetë deputet i partisë demokratike; duke ngritur një pikëpyetje për konfliktin e interesit të tij në këtë proces.
Deri më tani Basha ka përcaktuar drejtuesit e 7 qarqeve; ndërkohë që ende nuk janë zyrtarizuar ekipi politik për Tiranën; drejtuesi i Kukësit, Dibrës, Gjirokastrës e Beratit.
