Sot, më 19 tetor 2025, në Maqedoninë e Veriut po mbahen zgjedhjet lokale në 80 komuna dhe në kryeqytetin Shkup. Procesi i votimit ka nisur në orën 07:00 të mëngjesit, ndërsa qytetarët po zgjedhin kryetarët e komunave dhe anëtarët e këshillave komunalë, rreth një vit e gjysmë pas zgjedhjeve parlamentare dhe presidenciale.
Një ditë më parë, të shtunën, kanë votuar kategoritë e veçanta të zgjedhësve, përfshirë të sëmurët, personat në arrest shtëpiak, të burgosurit dhe të moshuarit në azile.
Në komunat ku asnjë kandidat nuk merr mbi 50% të votave, do të zhvillohet balotazhi më 2 nëntor.
Të drejtë vote kanë mbi 1.8 milion qytetarë, ndërsa rreth 112 mijë zgjedhës janë të regjistruar në listën e veçantë si banorë që jetojnë jashtë vendit.
Këto janë zgjedhjet e teta lokale që zhvillohen në Maqedoninë e Veriut që nga shpallja e pavarësisë. Në to marrin pjesë 309 kandidatë për kryetarë komunash dhe 576 lista këshilltarësh. Në garë janë 22 parti politike, 19 koalicione dhe 119 iniciativa qytetare apo kandidatë të pavarur.
Sipas sondazheve të fundit, rezultati në komunat me shumicë maqedonase pritet të jetë më i qëndrueshëm, ndërsa në zonat shqiptare parashikohet garë e fortë.
Partia VMRO-DPMNE prin me 26.7% të mbështetjes, e ndjekur nga Lidhja Socialdemokrate e Maqedonisë (LSDM) me 11.1%, ndërsa BDI dhe Aleanca Kombëtare për Integrim (AKI) renditen me nga 9.9%. Në vend të katërt qëndron koalicioni VLEN me 7.5%.
LSDM ndodhet në krizë të brendshme pas humbjes së rëndë në zgjedhjet e vitit 2024 dhe po përpiqet të ruajë pozitat në disa komuna kyçe.
Ndërkohë, në rreth 15 komuna me shumicë shqiptare, gara zhvillohet kryesisht midis BDI-së, koalicionit opozitar AKI dhe koalicionit VLEN, i cili aktualisht është partner qeveritar me VMRO-DPMNE-në.
