Zgjedhjet këtë vit do të jenë ndryshe nga herët e tjera, për shkak të pandemisë. Instituti i Shëndetit Publik ka hartuar një rregullore, që duhet mbajtur parasysh gjatë ditës së votimit, dhe të cilën e shpjegoi specialistja Jonida Haxhiu në studion e “7 pa 5” në “Vizion Plus”.
Ajo tha se ambientet e përcaktuara për të votuar do të dezinfektohen të shtunën. Gjatë të dielës do të ketë dezinfektime të tjera, por më të shkurtra në kohë.
“Është marrë në konsideratë edhe dezinfektimi i ambienteve. Qendrat e votimit do të dezinfektohen 24 orë përpara procesit të votimit dhe më pas do të dezinfektohen sërish ditën e votimit, kohë pas kohe, varësisht edhe rregullave që do të vendosen. Do të dezinfektohen duart nga të gjithë votuesit. Është shumë e rëndësishme edhe ajrosja e ambienteve. Këshillohen ambiente në kat të parë, me disa hyrje e dalje që të mos ketë kontakte të atyre që hyjnë me ata që dalin. Duhet patur kujdes që të mos mbingarkohen, të mos ketë më shumë se dy persona që bëjnë regjistrimin për të votuar, të ketë distanca.”
Jonida Haxhiu bëri me dije edhe se komisionerët e qendrave të votimit do të duhet të nënshkruajnë një deklaratë, ku pranojnë se nuk kanë asnjë shenjë të COVID-19.
“Anëtarët e komisioneve zgjedhore duhet të bëjnë një deklaratë ditën e zgjedhjeve, ku të konfirmojnë statusin e tyre, gjendjen e mirë shëndetësore, pa simptoma të COVID-19.”
Teksa qytetarët e infektuar nuk votojnë dot, të tjerët që do të shkojnë të shprehin vullnetin e tyre me votë duhet të kenë parasysh këto rregulla:
“Një qytetar që do të votojë, duhet të ketë parasysh ruajtjen e distancës, mbajtjen e maskës gjatë gjithë procesit të votimit, dezinfektimin e duarve para dhe pas votimit. Duhet të jemi të kujdesshëm sepse mund të ketë më shumë se një votues në radhë.”
Për mbarëvajtjen e këtyre rregullave do të jetë i përcaktuar edhe një monitorues nga KQZ, që do të kujdeset gjithë kohën. Nëse nuk zbatohen masat, specialistja e ISHP paralajmëroi qytetarët se do të ndëshkohen me gjobë.
