Zelenskiy shkarkon sekretarin e Sigurisë Kombëtare
Presidenti i Ukrainës, Volodymyr Zelenskiy, ka shkarkuar nga detyra sekretarin e Sigurisë Kombëtare dhe të Këshillit të Mbrojtjes.
Sipas mediave vendase Oleksandr Danylyuk ka ofruar dorëheqjen përpara se Zelenskiy të udhëtonte në Shtetet e Bashkuara, javën e kaluar, për të ndjekur punimet e Asamblesë së Përgjithshme të Kombeve të Bashkuara në Nju Jork, tha zyra e Zelenskiyt më 27 shtator.
Danylyuk, më vonë, e konfirmoi dorëheqjen, por në lidhje me këtë vendim nuk është dhënë asnjë arsye.
Nuk është e qartë nëse ai lidhet me bisedën telefonike që Zelenskiy ka zhvilluar me presidentin e Shteteve të Bashkuara, Donald Trump, për shkak të së cilës Kongresi amerikan ka nisur procedurat për shkarkimin e kreut të Shtëpisë së Bardhë.
Sipas transkriptimit të publikuar javën e kaluar nga Shtëpia e Bardhë, Trump, gjatë bisedës telefonike më 25 korrik, i ka kërkuar Zelenskiyt të hetojë për korrupsion rivalin e tij politik, Joe Biden, dhe djalin e tij.
