Presidenti i Ukrainës, Volodymyr Zelensky, nënshkroi një ligj që kufizon pavarësinë e dy agjencive kryesore kundër korrupsionit: Byrosë Kombëtare kundër Korrupsionit të Ukrainës NABU dhe Zyrës së Prokurorit të Posaçëm kundër Korrupsionit SAPO.
Ligji u miratua nga 263 deputetë në Parlamentin ukrainas, i cili ka gjithsej 450 vende.
Zelensky e mori këtë vendim pavarësisht protestave dhe kritikave nga aleatët evropianë të vendit të tij.
Qindra qytetarë protestuan në qendër të Kievit, duke i kërkuar presidentit që ta refuzonte ligjin.
Ata thanë se ishte miratuar me nxitim dhe se i hapte rrugë ndërhyrjes së Qeverisë në hetimet për korrupsion.
Protesta u mbajtën edhe në Dnipro dhe në qytete të tjera.
NABU heton rastet e korrupsionit në institucionet shtetërore, ndërsa SAPO ndjek penalisht rastet e tjera.
Që nga themelimi në vitin 2015, NABU ka zbuluar raste të rënda korrupsioni që kanë përfshirë edhe zyrtarë të lartë.
Në video-adresimin e tij të përditshëm, Zelensky tha se infrastruktura anti-korrupsion e Ukrainës duhet të pastrohet nga ndikimi rus, duke shtuar se NABU dhe SAPO do të vazhdojnë punën e tyre.
“Infrastruktura kundër korrupsionit do të funksionojë. Vetëm pa ndikimin rus, duhet të pastrohet nga kjo. Dhe duhet të ketë më shumë drejtësi. Sigurisht, NABU dhe SAPO do të funksionojnë. Është gjithashtu e rëndësishme që prokurori i përgjithshëm të jetë i përkushtuar për të siguruar llogaridhënie të vërtetë për ata që shkelin ligjin.Kjo është ajo që i duhet vërtet Ukrainës”, tha Zelensky.
Bashkimi Evropian e përshkroi vendimin e Parlamentit ukrainas për të miratuar projektligjin si një “hap serioz prapa”.
“Shkatërrimi i garancive kryesore që mbronin pavarësinë e NABU-së është një hap serioz prapa”, shkroi komisionarja për Zgjerim Marta Kos, në rrjetin social X.
