Masakra në shkollën Santa FE në Teksas ku 10 persona humbën jetën e disa të tjerë mbetën të plagosur, duket se ka nisur nga një histori dashurie te refuzuar. 17-vjeçari Dimitrios Pagourzis, i kishte propozuar disa herë shoqes së tij, Shana Fisher, një nga viktimat e sulmit me armë zjarri, por ajo e kishte refuzuar për 4 muaj.
Mediat amerikane shkruajnë se Dimitrios Pagourtzis, i cili u arrestua menjëherë pas masakrës, gjithashtu ishte pre e bullizmit pasi tallej nga shokët e klasës dhe trajneri I tij. Këto mendohet të janë dy pistat autoritetet mendojnë se mund ta kenë çuar të riun të ndërmarrë veprimin ekstrem.
Policia ka zbuluar se adoleshenti, ka shkruar në ditarin e tij se po planifikonte të vriste dhe të vetëvritej. Ai gjithashtu kishte shfaqur edhe një pasion për armët, pasi në profilin e tij në rrjetet sociale ka publikuar vazhdimisht foto me armë.
Familja e adoleshentit ndaj të cilit rëndojnë akuzat për vrasje dhe plagosje me paramendim, shpreh ngushëllimet për familjarët e viktimave, ndërsa thekson tronditjen për shkak të asaj që ndodhi, pasi djali i tyre ishte i qetë dhe i zgjuar.
Prindërit e 17-vjeçarit, autorit të masakrës, kanë vendosur të bashkëpunojnë me autoritetet deri në përfundim të hetimit për zbardhjen e plotë të ngjarjes së rëndë.
Edhe pse 17-vjeç, ai do të trajtohet në sistemin gjyqësor si i pandehur në moshë madhore, që lë të hapur mundësinë për dënimin me vdekje. Masakra në Shkollën Santa Fe ka rizgjuar debatin mbi ashpërsimin e ligjeve të armëve në Shtetet e Bashkuara të Amerikës.
Vrasja ndodhi vetëm pak muaj pas masakrës në Parkland, të Floridës, ku humbën jetën 14 nxënës dhe tre punonjës në Shkollën e Mesme Marjory Stoneman Douglas.
