Zbulohen lëvizjet e vrasësve, Klaudio Prendi u ndoq për afro një orë nga atentatorët
Një tjetër kamer sigurie ka fiksuar atentatin mafioz ku humbi jetën i riu Klaudio Prendi në Tiranë.
Këto pamje tregojnë mjetin tip “Audi” që afrohet në kohën kur Prendi po hipte në makinën e tij, duke e qëlluar disa herë me një armë me silenciator.
Duke analizuar këto pamje si dhe të tjera të marra nga kamerat e bizneseve në zonë, hetuesit kanë mundur të zbulojnë itinerarin e autorëve.
Makina e tyre rezulton të jetë parë përgjatë rrugës “Xhanfize Keko”, për rreth një orë para krimit.
Kjo tregon se ata kanë ndjekur lëvizjet e të riut dhe kanë pasur dijeni të plotë se ai ndodhej në lokal.
Po ashtu, në asnjë moment në makinën e autorëve nuk janë hapur xhamat e zinj.
Bashkë me viktimën në lokal ishin edhe 3 efektivë policie, miq të tij.
Dy prej tyre e kanë dërguar menjëherë në spital drejt Traumës, ndërsa efektivi i tretë është vënë në ndjekje të autorëve, por mjeti “Audi” ka humbur gjurmët pa shkuar te rreth-rrotullimi i Shkozës.
Nga ana tjetër policia do të verifikojë edhe njëherë pamjet e kamerave të sigurisë në zonën e Liqenit Artificial ku një vit më parë u vodh automjeti i autorëve.
Ndërkohë po pritet përgjigje nga autoritetet greke në lidhje me targat që i ishin vendosur makinës, nëse ato janë denoncuar si të vjedhura në Greqi apo jo.
/vizionplus.tv
