Policia e Tiranës ka zbardhur një konflikt të ndodhur mes disa personave rreth mesnatës së datës 11 gusht në rrugën “Gjolekë Kokona”, ku dhe u qëllua me armë zjarri.
Në kuadër të operacionit “Situata” u identifikuan 10 personat e përfshirë në konflikt, 4 prej të cilëve u vunë në pranga. Blutë bëjnë me dije se 4 të tjerë janë proceduar në gjendje të lirë, ndërsa 2 janë shpallur në kërkim.
Në pranga kanë rënë shtetasit Rezar Zaimi, 28 vjeç, për veprat penale “Përkrahja e autorit”, “Moskallëzimi i krimit” dhe “Prodhimi, mbajtja, blerja apo shitja pa leje e armëve të ftohta”; Kevin Kocibellinj, 31 vjeç, për veprat penale “Veprime që pengojnë zbulimin e së vërtetës” dhe “Përkrahja e autorit të krimit”, si dhe Stiven Fezollari, 24 vjeç dhe Rolf Fezollari, 34 vjeç, për veprën penale “Veprime që pengojnë zbulimin e së vërtetës”.
Në kërim u shpallën shtetasit Frenki Fezollari, 32 vjeç, për veprat penale “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”, dhe Cercis Brahimllari, 32 vjeç, për veprat penale “Moskallëzimi i krimit” dhe “Përkrahja e autorit të krimit”.
Nga veprimet hetimore të deritanishme dyshohet se shtetasi i arrestuar Rolf Fezollari ka fyer një të mitur të proceduar në gjendje të lirë. Si pasojë, 17-vjeçari dhe miq të tij janë konfliktuar fizikisht, me shtetasin Rolf Fezollari, vëllanë e tij, shtetasin Stiven Fezollari, dhe me miq të këtyre të fundit. Më pas, i mituri dhe miqtë e tij kanë shkuar me motomjete, te banesa e vëllezërve, nga ku dyshohet se ka qëlluar me armë zjarri, në drejtim të motomjeteve, vëllai tjetër i tyre, shtetasi i shpallur në kërkim, Frenki Fezollari, pa dëmtuar askënd.
Policia njofton se po punon për arrestimin e dy shtetasve të shpallur në kërkim, si dhe për dokumentimin me prova ligjore të rrethanave të këtij rasti.
