Në prag të referendumit të 30 shtatorit për çështjen e emrit me Greqinë, kryeministri i Maqedonisë Zoran Zaev ka udhëtuar drejt Uashingtonit ku do të takohet me zëvendës presidentin amerikan Mike Pence.

 

Temë e diskutimit do të jetë përparimi i Republikës së Maqedonisë drejt anëtarësimit në NATO dhe marrëveshja e emrit me Greqinë.

 

Vizita e Zaev në Uashington pason vizitat e sekretarit amerikan të Mbrojtjes, Xhejms Matis dhe të ndihmës sekretarit, Wes Mitchel në Maqedoni dhe mbështetjes së shprehur për referendumin e ardhshëm.

 

Edhe presidenti Donald Trump me anë të një letre drejtuar presidentit të Maqedonisë, Gjorge Ivanov, shprehu mbështetje për referendumin, duke e vlerësuar atë si një mundësi historike për Maqedoninë.

 

Ndërkohë sot Shkupin do ta vizitojnë Ministrja gjermane e Mbrojtjes, Ursula fon der Lain. Ajo do të zhvillojë bisedime me ministren e Mbrojtjes së Maqedonisë, Radmilla Sheqerinska.

 

Edhe Ambasadori francez dhe ish i dërguar special i BE-së në Maqedoni në vitin 2001-2002, Alen le Roa, do të qëndrojë në Shkup në një vizitë dy ditore ku do të zhvillojë takime me përfaqësues politik mbi referendumin e 30 shtatorit.

Leave a Reply

Your email address will not be published. Required fields are marked *