Kandidati për deputet i PS në Tiranë, Etjen Xhafaj deklaroi se për Partinë Socialiste është një mision i vështirë sigurimi i mandatit të tretë, por jo i pamundur. Gjatë një interviste për edicionin qendror të lajmeve në “Vizion Plus”, Xhafaj tha se pika e fortë e PS është mbështetja që ka ofruar për qytetarët gjatë dy sfidave të mëdha të pandemisë dhe tërmetit.
“Është një mision i vështirë, por jo i pamundur. Është i vështirë se mandati i dytë u shoqërua me tërmetin dhe pandeminë, kemi patur vështirësi të pazakonta. Por besoj se është shumë i mundur pikërisht nga këto vështirësi. Qeveria e ka treguar veten si në rastin e pandemisë, edhe në atë të tërmetit. Është normale të ketë një konsumim që vjen nga pushteti, njerëz të pakënaqur që votojnë kundër. Por ne kemi bërë në kohë krize një reagim që ka qenë model, opozitën nuk e kemi patur fare aty dhe pavarësisht se nuk i kemi kënaqur të gjithë, kemi qenë shumë eficent në menaxhimin e krizave të mëdha.”
Ai komentoi edhe përleshjet e ditëve të fundit, duke u shprehur se tensionet po krijohen nga opozita. Sa i takon skuadrës së PS, Etjen Xhafaj tha se u tregua që dyert e PS janë të hapura për të gjithë.
“Është një sistem sfidues, si për kandidaët e rinj, edhe për të vjetrit. Shumë nga senatorët e PS u vendosën në pozicione të rrezikshme, kurse të rinjve ju hap rruga. Kjo trego filozofinë e PS si një parti me dyer të hapura. Kjo është pika që bën kontrastin me kundërshtarët.”
