Presidenti i Serbisë, Aleksandar Vuçiç, deklaroi se vendi i tij po mban zi për policin e Kosovës që u vra në veri. Kjo deklaratë e Vuçiç vjen pas reagimit të ashpër të Tiranës zyrtare, për shpalljen e tri ditëve zi kombëtare të Serbisë, në nder të terroristëve të vrarë.
Vuçiç quajti gënjeshtar Ramën dhe tha se në fakt Serbia po mban zi për çdo të vrarë nga përplasjet në veri.
“Serbia ka caktuar Ditë zie për ngjarjet tragjike në Kosovë dhe Metohi, për vdekjen e të gjithë njerëzve. Nga pikëpamja e Kushtetutës së Republikës së Serbisë, të gjithë janë qytetarë të vendit tonë. Serbia ka ditë zie për tre serbët e vrarë dhe për policin e vrarë. Është një vendim i civilizuar, serioz dhe i përgjegjshëm. Edi Rama nuk po thoshte të vërtetën. Është e vërtetë se komunat serbe në veri të Kosovës dhe Metohisë kanë shpallur ditë zie për serbët e vrarë. Ne shpallëm ditë zie për të gjitha ngjarjet dhe për të gjithë të vrarët. Nuk është hera e parë që Rama nuk e thotë të vërtetën”, tha Vuçiç.
Kryeministri Rama kërkoi që BE të dënojë qëndrimin e Serbisë ndaj vrasjes së policit të Kosovës dhe shkeljes së integritetit territorial të saj nga grupi i terroristëve që sulmuan me municion luftarak uniformat blu.
