Deklarata e presidentit turk, Rexhep Tajip Erdogan, i cili theksoi se do të punojë për të bindur shtetet që janë ende skeptike të njohin pavarësinë e Kosovës ka sjellë reagime të ashpra nga Beogradi zyrtar.
Presidenti i Serbisë, Aleksander Vuçiç, gjatë vizitës së tij në manastirin Manasi, tha se do të bisedojë me presidentin turk për ta parandaluar një veprim të tillë.
“Unë do të përpiqem të flas me të. Deri më 1 shtator, sipas marrëveshjes së Uashingtonit, të dy palët detyrohet të mos lobojnë për njohje ose çnjohje. Nëse ata fillojnë aksionin e njohjes para kësaj date, ne do ta kundërshtojmë atë. Na mbetet të luftojmë për vendin dhe popullin tonë. Erdogan është shumë i fuqishëm, ne nuk jemi, dhe shpresoj se ai do të zbutet. Nëse ai nuk zbutet, ne do të luftojmë për vendin tonë. Ju do të shihni se ne nuk jemi aq të vegjël.”
Një ditë më pare, Erdogan deklaroi se këtë vjeshtë do të nisë bisedimet me presidentin amerikan, Joe Biden për njohjen ndërkombëtare të Kosovës gjatë Asamblesë së Përgjithshme të Kombeve të Bashkuara.
Serbia, në marrëveshjen e Uashingtonit të 4 shtatorit, është dakordësuar që ta ndalë fushatën për tërheqjen e njohjeve të Kosovës, ndërsa Prishtina zyrtare nuk duhet te aplikojë për anëtarësim në organizata ndërkombëtare për një vit.
