Vret kunatën me armë në Bathore, autori kishte përplasje për çështje pronësie

Një tjetër krim brenda familjes ka tronditur Tiranën. Kunati ka vrarë më armë zjarri bashkëshorten e vëllait të tij për motive të dobëta. Ngjarja e rëndë ka ndodhur rreth orës 17:40 në rrugën Apollonia në zonën e Bathores.

Agron Tanushi pas një debati me Jetmira Hasanin, e ka qëlluar këtë të fundit me armë zjarri duke e lënë të vdekur në vend.

Menjëherë pas krimit, 31-vjeçari është larguar duke i shpëtuar policisë.

Sipas burimeve, shkak i vrasjes janë përplasjet për motive pronësie pasi viktima dhe autori jetonin në një banesë.

Vëllai i Agron Tanushit ndodhet në emigrim në Greqi prej shumë vitesh dhe bashkëshorten e tij, Jetmira Hasanin e kishte lënë tek familja e tij.

Sipas burimeve policorë, në vendngjarje nuk është gjetur as arma e krimit, që  dyshohet se është marrë nga vetë autori.

Sipas banorëve të zonës, dy familjet prej kohësh kishin konflikte mes tyre.

Në vendngjarje kanë mbërritur edhe familjarët e viktimës, ku i vëllai ka akuzuar të afërmit e autorit si nxitës së kësaj ngjarjeje. Është dashur ndërhyrja e policisë për ti ndarë dy familjet.

Mësohet se konflikti kishte vite që zhvillohej deri mbrëmjen e kësaj të marte, duke patur një fund tragjik.

Ndërkohë në disa akse akse rrugore policia ngriti postoblloqe për arrestimin e autorit.