Një shtetas shqiptar, i identifikuar si Artan Dragoshi, 46 vjeç, u arrestua nga policia greke pas dhjetë vitesh arrati. Mediat fqinje raportojnë se ai ka vrarë dhe më pas grabitur një të moshuar, në Messinia të Greqisë.
Shqiptari akuzohet se i ka marrë jetën një 79-vjeçari, që e kishte punësuar atë në vitin 2011, së bashku me bashkatdhetarin e tij, Bariam Mondi. Ata punonin në pronën e të moshuarit dhe kishin fjetur në një shtëpi rurale në emër të tij, por nuk paguanin qira. Për këtë arsye, 79-vjeçari iu kishte kërkuar të largoheshin.
Më 8 maj 2011, ata u përleshën dhe shqiptari e mbyti me ndihmën e bashkatdhetarit të tij. Autorët më pas shkuan në shtëpinë e viktimës, rrëmbyen 200 euro, hëngrën, fjetën dhe u larguan në mëngjes.
Pavarësisht ngjarjes, Artan Dragoshi lëvizte i lirë në të njëjtën zonë, i pashqetësuar, deri në momentin që u prangos.
