Vijojnë të mbeten mister shkaqet që çuan 26 vjeçarin Qemal Sela të vriste një ditë më parë dy prindërit e tij në qytetin e Peshkopisë.
Edhe pse kanë kaluar disa ore nga ngjarja e rëndë që tronditi qytetin veri-lindor, i riu i cili sapo ishte deportuar nga Anglia, nuk ka thënë asgjë në polici.
Kjo e fundit bën të ditur se Sela është në fazë të rëndë depresive dhe nuk ka dhënë asnjë motiv të krimit.
Burime nga policia e Dibrës thanë se 26 vjeçari sapo të flasë do të transportohet menjëherë në spitalet e psikiatrisë së vendit, pasi gjendja e tij është kritike gati në kushtet e skizofrenise.
Vëllai i autorit i cili është marrë në pyetje nuk ka dhënë asnjë version të ngjarjes pasi në atë moment ka deklaruar se ka qenë në qendër të qytetit.
Motra e tij 14 vjeçare po trajtohet me psikolog pas tronditjes së pësuar pasi ka parë gjithë skenën.
Policia e Dibrës nuk ka arritur të marrë asnjë dëshmi të vlefshme nga personat që kanë qenë në atë moment në hotel, pasi kanë deklaruar se kanë dëgjuar vetëm të shtënat e automatikut.
Një ditë më parë Qemal Sela zbrazi plumbat mbi babain dhe nënën e tij Flamur e Zeqimete Sela, duke i lënë të vdekur në vend.
