“Pasi e vrava, kam lajmëruar vetë policinë për krimin dhe më pas u largova”. Kjo ka qënë dëshmia e dhënë përpara hetuesve nga Eduart Afmataj, autori i dyshuar i vrasjes së fqinjit të tij Artur Cangu në fshatin Vrion të Niklës në Fushë-Krujë.
33-vjeçari i arrestuar pa kaluar 24 orë nga krimi i rëndë ka shpjeguar të gjithë dinamikën përpara grupit hetimor në lidhje me vrasjen të 48-vjeçarit, me të cilin prej disa kohësh kishin koflikte për shkak të pronave.
Afmataj deklaroi se fillimisht mes tyre ka pasur një konflikt verbal, e më pas, sipas autorit, viktima e ka goditur me një kosë të vogël në krah. Pas kësaj, 33-vjeçari ka treguar se, ka marrë çiften dhe e ka qëlluar Cangun duke e lënë të vdekur. Menjëherë pas krimit, ai ka lajmëruar Policinë duke i treguar për ngjarjen dhe më pas është larguar.
Autori u arrestua në një zonë të thellë malore ku ishte fshehur në një banesë të braktisur ndërsa gjatë kapjes nuk ka bërë asnjë rezistencë. Ndërkohë që policia ende nuk ka arritur që të zbulojë se ku ka fshehur armën e krimit.
Konfliktet mes tyre kishin nisur parpara dy vitesh lidhur me pronësinë e një sipërfaqeje toke./vizionplus.tv
