Një ngjarje tronditëse ka shokuar komunitetin lokal të Makrineias, në zonën e Agrinjos, në Greqi, pas vrasjes së kryeplakut të komunitetit Lithovouni, 51-vjeçarit Kostas Alexandris. Viktima ishte i martuar dhe baba i një fëmije të mitur.
Sipas të dhënave paraprake nga hetimet dhe dëshmitë e mbledhura nga policia greke, motivi i krimit dyshohet të jetë personal dhe lidhet me një grua, çka përforcon pistën e një konflikti me prapaskenë erotike. Autor i dyshuar i ngjarjes është një 44-vjeçar me shtetësi shqiptare, i cili besohet se kishte një lidhje intime me bashkëshorten e viktimës.
Ngjarja ndodhi në fshatin Spathohori, ku autori i kishte ngritur pritë 51-vjeçarit. Në momentin që viktima po kalonte me automjetin e tij, 44-vjeçari e ka qëlluar tri herë me armë gjahu. Si pasojë e të shtënave, Alexandris ka humbur kontrollin e mjetit dhe ka përfunduar në një greminë, ku u gjet më pas nga banorët e zonës, pa shenja jete.
Burime policore bëjnë me dije se viktima, i veshur me rroba të errëta, është gjetur i shtrirë me fytyrë nga sedilja e pasagjerit. Brenda automjetit, policia ka gjetur edhe një armë gjahu, fakt që tregon se edhe viktima ishte e armatosur. Gjithashtu, shenja nga saçmat janë konstatuar jo vetëm në pjesën e pasme, por edhe në pjesën e përparme të automjetit.
Disa orë pas krimit, autori ka kontaktuar vetë autoritetet policore, duke pranuar vrasjen dhe duke shprehur gatishmërinë për t’u dorëzuar. “Ejani të më merrni nga shtëpia, unë e vrava”, mësohet të ketë deklaruar ai. Sipas informacioneve, 44-vjeçari ka dorëzuar edhe armën e krimit, e cila rezulton se mbahej me leje.
Pas arrestimit, autori është shoqëruar në Drejtorinë Vendore të Policisë, ndërsa hetimet vijojnë për të sqaruar plotësisht rrethanat dhe dinamikën e ngjarjes së rëndë, e cila ka tronditur thellë opinionin publik në zonë.
/vizionplus.tv
