Në Greqi vazhdojnë hetimet për të identifikuar autorët e grabitjes, që përfundoi me vrasjen e një 20-vjeçareje. Referuar “CNN” grek, autoritetet policore po kërkojnë në mafien shqiptare dhe gjeorgjiane për autorët.
Natyra e egër e grabitjes, e cila çoi në vrasjen e një nëne të re para burrit dhe foshnjës së saj, u referohet autorëve të huaj, siç vlerësohet që në momentin e parë nga oficerët e policisë të përfshirë në hetime.
Raporti mjekoligjor konfirmon zemërimin e grabitësve me nënën e re, që bëri rezistencë.
Vrasësi i mbylli gojën me lecka dhe më pas e mbyti me pëllëmbët e duarve.
Vihet re se fillimisht u mbështet mundësia e mbytjes me jastëk, një skenar që tani është përjashtuar.
Përveç kësaj, ka shenja të zbehta të rezistencës në fytyrën e vajzës. Autoritetet po kalojnë në “mikroskop” gabimet e autorëve.
“Ata bënë gabime. Ata qëndruan në shtëpi për një kohë të gjatë. Ata luftuan me viktimën e tyre, ata nuk llogaritën të dhënat që lanë pas, në tërbim për të gjetur paratë”, u shpreh një zyrtar që ka dijeni për hetimet, për “CNN” grek.
Shpresat për zbulimin e autorëve janë varur te teknologjia dhe kërkimi i detajuar. Shenjat e gishtërinjve dhe AND-së po skanohen dhe pritet të zbulojnë detaje të reja.