Gjykata e Prishtinës ka zgjatur me dy muaj paraburgimin për tre të dyshuarit për vrasjen e Liridona Ademajt, bashkëshortin e saj Naim Murseli, Granit Plavën dhe Kushtrim Kokallën.
Zëdhënësja e Gjykatës Themelore në Prishtinë, Mirlinda Gashi, ka njoftuar se ‘kjo gjykatë ka vendosur vazhdimin e masës së paraburgimit ndaj Murselit, Plavës dhe Kokallës, të dyshuar për vrasjen e Liridona Ademajt’.
Kujtojmë që ngjarja e rëndë ndodhi mbrëmjen e 29 nëntorit, në fshatin Bërrnicë të Komunës së Prishtinës. Në pranga për vrasjen kanë rënë tre persona, përfshirë këtu edhe bashkëshorti Naim Murseli, i vili dyshohet si porositës i vrasjes.
Krimin dyshohet se e ka kryer Granit Plava, pasi Murseli i kishte premtuar 30 mijë euro. I dyshuar është edhe nipi i Murselit, Kushtrim Kokalla, që ishte pjesëtar i FSK’së.
Murseli akuzohet për veprën penale “Vrasje e rëndë në bashkëkryerje”, Plava për veprën penale “Vrasje e rëndë” dhe vepën penale “Mbajtja në pronësi, kontroll ose posedim të paautorizuar të armëve”, derisa Kokalla për shkak të veprës penale “Marrëveshja për të kryer veprën penale Vrasje e rëndë.”.
Ende nuk dihet motive i vrasjes, teksa drejtori i Policisë së Kosovës, Gazmend Hoxha, ka deklaruar para disa javësh se po hetohen disa pista, por ende nuk mund të bëhen publike derisa të ketë një përfundim të qartë mbi motivin e vrasjes. /vizionplus.tv
