18-vjeçari, Ensi Maze, do të qëndrojë në burg deri në përfundim të hetimeve për vrasjen e 20-vjeçarit Stivens Toshkësi, me vendim të Gjykatës.
Togat e zeza e lanë në qeli të riun që bashkë me Axel Hoxhajn, po 18 vjeç, vranë me thikë të riun pas një konflikti mes tyre. Avokati i Ensi Mazes, Tonin Prendi, pas caktimit të masës së sigurisë, u shpreh se klienti i tij nuk është i përfshirë në krimin e mesnatës së 18 prillit.
TONIN PRENDI
AVOKAT
Nga pamjet filmike del që Ensi Maze nuk ka bërë asnjë veprim ndaj pasagjerit. Ishte shoku i viktimës, pasagjeri që sulmonte Ensi Mazen. Më pas ka ndodhur ajo që ka ndodhur. Si Ensi maze edhe familjarët e tij janë të lehtësuar pas publikimit të pamjeve sepse e shohin se nuk ka kryer asnjë veprim të dhunshëm. Maze është vetëdorëzuar, në momentin që ka ndodhur ngjarja ka komunikuar me të atin dhe i ka thënë se jam tek stadiumi Arena dhe aty ka shkuar ta marrë policia. Vajza ka deklaruar se nuk ka pasur asnjë lidhje apo konflikt me Mazen.
I riu studion në Holandë për menaxhim biznesi dhe pritej të kthehej në këtë shtet vetëm një ditë pas ngjarjes tragjike.
TONIN PRENDI
AVOKAT
Është student në Holandë dhe ka ardhur më 13 prill, me biletë kthimi më 19 prill. Duke qenë se këto ditë ka takuar edhe shokët e tij, një prej tyre Axel Hoxhaj, duke lëviz në trotuar ka ardhur një mjet ka ndaluar dhe ka ndodhur ngjarja. Ka parë që shoku i tij ka shkuar në drejtim të shoferit, dhe për të shuar konfliktin ka tentuar të ndalojë dhe mos të lërë pasagjerin të dalë. Më pas ai i vërsulet, dhe nga pamjet që dalin shihet se nuk bën asnjë veprim të dhunshëm kundër pasagjerit, por ai e sulmonte atë. Ensi Maze nuk ka parë asnjë hanxhar, as Hoxha nuk e ka informuar për ndonjë konflikt të mundshëm.
Të shtunën pritet të caktohet masa e sigurisë edhe ndaj Axel Hoxhaj, i cili u vetëdorëzua në polici. Ngjarja ndodhi vetëm 35 minuta pas mesnatës së të martës, në rrugën “4 Dëshmorët” pranë gjimnazit “Partizani”, ku 20-vjeçari po kthehej nga puna.
Konflikti dyshohet se lindi për një vajzë, e cila më herët kishte qenë në një tjetër marrëdhënie. Pas ngacmimeve në rrjete sociale, Toshkësi shkoi për t’u sqaruar me adoleshentët, por konflikti përfundoi me vrasjen e tij.
