Mandati i Olta Xhaçkës është bërë “mollë sherri” mes PD-ve. Ditën e sotme 44 deputetë të opozitës kanë firmosur për të ridërguar në Gjykatën Kushtetuese mandatin e Olta Xhaçkës, ku pjesë e tyre kanë qenë edhe dy deputete të grupit Basha, Eralda Bano dhe Ori Nebiaj.
Vetë kryedemokrati Lulzim Basha ka qenë kundër ridërgimit të mandatit në Gjykatë Kushtetuese, pasi sipas tij opozita duhet të kishte ndërmarrë hapa të forta në Kuvend.
Pas reagimit të Bashës, ka ardhur edhe përgjigjja e Eralda Banos, e cila ka sqaruar pozicionin e saj në këtë çështje.
Në reagimin e saj Bano thekson se vota kundër Olta Xhaçkës nuk e bën atë pjesë të Rithemelimit, pasi qëndrimi i saj është mbi çdo grupim politik. Sipas Banos ajo do të votojë kundër çdo individi të akuzuar për korrupsion, qoftë ky i majtë apo i djathtë.
Reagimi i plotë:
Të dashur qytetarë,
Të nderuar demokratë,
Ndjej të nevojshme që për herë të fundit të sqaroj pozicionin tim politik në Partinë Demokratike të Shqipërisë.
Në asnjë çast vota ime kundër zonjës Xhaçka nuk ka sesi të jetë pozicionim i imi në krahun e rithemelimit. Unë i përkas Partisë Demokratike zyrtare siç e quajnë disa, Partisë Demokratike të udhëhequr nga Lulzim Basha. Këtë zgjedhje e kam bërë që ditën e parë dhe sot jam më e bindur se kurrë për pozitën time.
Jam e detyruar të sqaroj këtë, pasi kam dhënë firmën timë kundër Olta Xhaçkës bashkë me deputetët e rithemelimit. Kjo ndodhi sepse në parim unë do të luftoj me çdo mjet një individ si ish ministrja e cila ka mbi supe akuza nga drejtësia, të cilat ja kam përmendur në parlament.
Përballja me të vërtetën e bëri zonjën Xhaçka ta kthente fjalën time në një vendeta personale ku më etiketoi si top lecke, kukull e kurdisur e sinonime të tjera të shemtuara të cilat më kanë shkelur rëndë në parim si njeri, si grua, si nënë dhe si politikane.
Unë jam e qartë në pozicionin tim sepse kam vendosur që në karrierën time politike, sado që ajo të zgjasë, të jem në krah të drejtësisë. Thënë kjo unë qëndroj krah të vetmit grupimi politik i cili ofron figura të papërlyera. Kjo nga ana tjetër më jep të drejtën të votoj kundër çdo figure të korruptuar, majtas e djathtas aq më tepër kur kjo figurë nuk ka guxim të kërkojë ndjesë për arrogacën dhe marrëzinë që ka treguar ndaj çdo shqiptari, duke i vendosur pseudonimin “ata nga mali”.
Qëndrimi im kundrejt zonjës Xhaçka tejkalon çdo lloj grupimi politik apo ndasie politike, kjo sepse demi që ajo i ka bërë shqiptarëve dhe Shqipërisë nuk ka të bëjë me pozicionim politik por ka të bëjë me të gjithë ne si qytetarë shqiptarë.
