Kuvendi do të mblidhet sot në seancë plenare në orën 10:00, ku pritet të votohet për kërkesën e SPAK për heqjen e imunitetit të deputetes socialiste Belinda Balluku. Kuvendi pritet të shqyrtojë dy raportet e paraqitura nga maxhoranca dhe opozita lidhur me kërkesën e SPAK për dhënien e autorizimit për arrestimin e deputetes socialiste, Belinda Balluku.
Kjo kërkesë ndodhet në Kuvend që prej 16 dhjetorit të vitit të kaluar dhe votimi i sotëm pritet të vulosë fatin e saj.
Partia Socialiste dhe Partia Demokratike shkojnë në seancë me qëndrime të kundërta. Socialistët argumentojnë se Balluku, tashmë pa funksion ekzekutiv dhe e shkarkuar nga posti i ministres së Infrastrukturës dhe Energjisë si dhe nga posti i zëvendëskryeministres, nuk paraqet rrezik për prishje provash apo arratisje. Sipas tyre, SPAK mund të vijojë hetimet pa qenë e nevojshme masa e “arrestit me burg”. Për të rrëzuar kërkesën e SPAK, maxhorancës i mjaftojnë 71 vota.
Ndërkohë, demokratët që dorëzuan të parët raportin e tyre këmbëngulin se heqja e imunitetit të deputetes dhe autorizimi për arrestimin e saj është i domosdoshëm. Sipas opozitës, ekziston rreziku që Balluku të ndikojë te dëshmitarët apo të prishë provat.
Në seancë, raporti i maxhorancës do të prezantohet nga ministri i Drejtësisë, Ulsi Manja, ndërsa raporti i opozitës do të lexohet nga deputeti Oerd Bylykbashi, në mungesë të kreut të Grupit Parlamentar demokrat, Gazment Bardhi, i cili është përjashtuar nga Komisioni i Etikës.
SPAK kërkoi në dhjetor autorizimin për arrestimin e Ballukut, pasi më herët ajo ishte pezulluar nga dy funksionet e saj në qeveri dhe ndaj saj është vendosur masa e ndalimit për të dalë jashtë vendit.
Protestë para Kuvendit
Paralelisht me zhvillimet në parlament, Partia Demokratike ka paralajmëruar protestë para Kuvendit në të njëjtën kohë me seancën plenare. PD u ka dërguar mesazhe anëtarëve dhe mbështetësve në rrjetet sociale, duke i ftuar të marrin pjesë në protestën që nis në orën 10:00.
Edhe kreu i opozitës, Sali Berisha, u bëri thirrje qytetarëve të bashkohen në protestë, duke e cilësuar atë si një moment të rëndësishëm në përballjen me qeverinë
/vizionplus.tv
