Gazetari Armir Shkurti ishte i ftuar këtë të enjte në emisionin “Quo Vadis” në Vizion Plus, nën moderimin e Pranvera Borakajt.
Sa i përket votës së diasporës, Shkurti tha se emigrantët nuk e njohin realitetin e vendit tonë. Sipas tij, shqiptarët jashtë vendit i njohin kryetarët e partive dhe kandidatët vetëm nga rrjetet sociale.
Gazetari deklaroi se kërkesat e tyre në takimet e zhvilluara me kryeministrin Rama, në kuadër të votës së diasporës, treguan se ata janë jashtë realitetit tonë.
Armir Shkurti gjithashtu theksoi se shumica e emigrantëve do të votojnë sepse u kërkohet nga familja e tyre në Shqipëri.
Shkurti: I keni ndjekur takimet e Ramës në diasporë? Aty, emigrantët u dukën më mediokër sesa elektorati i PS-së. Kërkesat e tyre ishin jashtë realitetit tonë këtu. Këtyre njerëzve ua blenë votën familjarët. Ata kanë një shkëputje nga vendi, sidomos ai brez që ka lindur jashtë Shqipërisë. Të drejtën e votës e ka ai, por voton për hatrin tim, sepse unë i them të votojë. Ai jashtë shtetit të njeh vetëm nga Facebook-u. Shqiptari i diasporës njeh Shqipërinë e Ramës, jo realitetin. Duhet të shohim realitetin siç është. Të gjithë duan të dalin në televizion tani, vetëm për të qenë prezentë.
