Mbi 1300 turistë, vendas e të huaj, e kanë vizituar fshatin turistik të Voskopojës vetëm gjatë muajit maj.
Kjo bëhet me dije nga Drejtoria rajonale e Kulturës Kombëtare, e cila i referohet këtij numri vizitorësh në objektet muzeale të këtij fshati me trashëgimi të pasur historike.
“Turistët shfaqin interes për të vizituar Voskopojën, për kishat e saj por edhe klimën e veçantë malore e traditat që ruhen në këtë fshat”, tha Gjergji Koki, drejtor I drejtorisë rajonale të monumenteve të kulturës.
Voskopoja si fshat i afërt me Korçën e vendndodhje rreth 20 kilometra, është një fshat që dikur kishte egzistencën e mirëfilltë të një qyteti. Voskopoja konsiderohet si një thesar kulturor që në themelimin e saj, me vlera te veçanta jo vetëm për rajonin e Korçës, Shqipërinë, por edhe për Ballkanin.
Kisha ”Shën Nikolla” , Kisha ”Shën Maria” , Kisha ”Shën Ilia”, Manastiri i ”Shën Prodhromit ”, Kisha ”Shën Thanasi”, Kisha ”Shën Mëhilli” , janë monument kulture të kategorisë së parë në këtë fshat. Krahas kësaj trashëgimie, investimet në rritje si ato private edhe nga bashkia për infrastrukturën e Voskopojës, e mbajnë këtë fshat në elitën e turizmit rajonal në Korçë.