Presidentja e Komisionit Evropian, Ursula von der Leyen, mbajti këtë të mërkurë fjalimin vjetor në Parlamentin Evropian. Ajo foli për situatën në Ukrainë, krizën energjitike dhe ekonomike si dhe për Ballkanin Perëndimor.
Shefja e komisionit u shpreh se vendet e Ballkanit Perëndimor, por edhe Ukraina, Gjeorgjia dhe Moldavia duhet të bëhen sa më shpejt pjesë e unionit, pasi pa to unioni nuk është i plotësuar.
URSULA VON DER LEYEN
PRESIDENTJA E KOMISIONIT EVROPIAN
Ne duhet të jemi në anën e shteteve që janë në rrugën e tyre drejt BE, sepse rruga drejt demokracisë së fuqishme dhe rruga drejt Bashkimit Evropian është e njëjtë. Prandaj, dua që njerëzit në Ballkanin Perëndimor, në Ukrainë, në Moldavi dhe në Gjeorgji ta dine se janë pjesë e familjes sonë, e ardhmja e tyre është në union dhe unioni ynë nuk është i kompletuar pa ju.
Shefja e Komisionit Evropian preku gjerësisht edhe çështjen e Ukrainës dhe krizës energjitike. Ajo tha se unioni ka marrë masat për të përballuar këtët sfidë si dhe ka reduktuar ndjeshëm varësinë nga Moska.
URSULA VON DER LEYEN
PRESIDENTJA E KOMISIONIT EVROPIAN
Propozimi ynë do të mbledhë më shumë se 140 miliardë euro për vendet anëtare për të zbutur goditjen drejtpërdrejt në ekonomitë e tyre. Vladimir Putin do të dështojë me rrugën e nisur. Ukraina dhe Evropa do të triumfojnë.
Vendet e unionit po përpiqen të frenojnë një krizë energjetike dhe të gjejnë rrugë alternative për të përballuar dimrin ndërkohë që inflacioni në eurozonë ka kapur shifra rekord.
Rusia ka ndërpresë tërësisht furnizimin me gaz për Europën si kundërpërgjigje ndaj sanksioneve, ndërsa Von der Leyen tha se sanksionet do të vazhdojnë ndaj Moskës duke mos bërë asnjë hap pas.
