Ish-deputetja Albana Vokshi mendon se Partia Demokratike nuk do të hasë vështirësi në përmbushjen e pretimit për rritjen e pagave për mësuesit. Në një intervistë për edicionin qendror të lajmeve në “Vizion Plus”, Vokshi tha se diçka të tillë PD e ka realizuar edhe gjatë tetë viteve kur ishte në qeverisje.
“I gjithë plani i PD është falë një pune shumë mujore i ekspertëve më të mirë, është më shumë se e mundur rritja e pagave të mësuesve. Është diçka që PD e ka bërë në mënyrë të sukseshme gjatë tetë viteve 2005-2013. Kemi rritur pagat për kategori të ndryshme të mësuesve. Përderisa ka qenë e mundur atëherë, nëse punohet me vullnet politik, nëse nuk vidhet, nëse luftohet korrupsioni, sigurisht që ka edhe për rritjen e rrogave, edhe për përmirësimin e infrastrukturës. Evidentohet fakti që 90% e shkollave nuk përmbushin kushtet themeltare, as 50% e familjeve nuk kanë internetin për mësimin në distancë. Kjo do të thotë që prej keqmenaxhimit të situatës nga ana e Edi Ramës, po rritet një brez me deformime apo me mungesa në arsim. Kjo do të riparohet menjëherë pas 25 prillit, kur Edi Rama të jetë larguar me votë dhe qeveria e re të nisë punën, ku arsimi do të ketë një rol qendror në programin e PD”, deklaroi ajo për “Vizion Plus”.
Duke ndalur theksin tek zotimi për libra falas për nxënësit, Albana Vokshi shpjegoi se kjo do të përfshijë fëmijët nga klasa e parë deri në klasën e nëntë. Partia Demokratike premton edhe rritje pagash për profesorët në universitete dhe anulimin e ligjit për arsimin e lartë.
