Ish-deputetja Albana Vokshi, në një takim me mësues të arsimit parauniversitar, ftoi arsimtarët që t’i bashkohen Partisë Demokratike.
Ajo ngriti shqetësimin e sistemit arsimor gjatë 8 viteve të qeverisë Rama, të cilin e quajti degradues, ndërsa vuri në dukje edhe sjelljen dhe masat e qeverisë gjatë ketij viti të pandemisë. Sipas saj, nuk u investua as për sigurinë në shkolla, as për mësimin online.
“Më shumë se gjysma e nxënësve nuk kanë internet ose mjetet e duhura për shkollën online. Qeveria ka stimuluar uljen e cilësisë së mësimdhënies, duke mos investuar asnjë qindarkë për arsimin online. Mësimi online ka dështuar, sepse qeveria ka dështuar, duke rrezikuar që të rritet një brez Covid.”
Nga ana tjetër, disa mësuesit folën për problemin e orëve shtesë të papaguara.
“Pavarësisht braktisjes nga qeveria, dua t’ju falenderoj që nuk hiqni dorë, duke ju garantuar se me PD në qeveri, mësuesi, pedagogu do të jetë në qendër të vëmendjes, që arsimimi cilësor të jetë prioriteti ynë. Nëse një qeveri nuk investon në arsim, është një shoqëri e prapambetur. Prandaj ne do të investojmë në arsim, edhe si investimi më i madh që i kthehet ekonomisë dhe shoqërisë.”
